કેબિનેટ મંત્રીશ્રી બળવંતસિંહ રાજપુતની વિશેષ ઉપસ્થિતમાં વન મહોત્સવની ઉજવણી કરવામાં આવી
વડાપ્રધાન નરેન્દ્રભાઈ મોદીના નેતૃત્વમાં વૃક્ષારોપણ આજે જન આંદોલન બન્યું છે :- કેબિનેટ મંત્રીશ્રી બળવંતસિંહ રાજપૂત
પાટણ જિલ્લામાં ૭૬મા જિલ્લા સ્તરીય વન મહોત્સવની ઉજવણી પાટણ ખાતે હેમચંદ્રાચાર્યે ઉત્તર ગુજરાત યુનિવર્સિટીના કન્વેશન હોલમાં કેબિનેટ મંત્રીશ્રી બળવંતસિંહ રાજપુતની અધ્યક્ષતામાં ઉજવણી કરવામાં આવી હતી. જે અંતર્ગત જિલ્લામાં ૧૪.૬૯ લાખ રોપાઓના ઉછેર થકી જિલ્લાને લીલોછમ કરવા માટેનો લક્ષ્યાંક રાખવામાં આવ્યો છે. વન મહોત્સવ મોડલ હેઠળ ૨૭.૩૫ લાખ રોપાઓનો ઉછેર કરવામાં આવ્યો છે જે રોપાઓને ગ્રામ પંચાયતો, સ્વૈચ્છિક/ સરકારી સંસ્થાઓ, ખેડૂતો તેમજ અન્ય જનતામાં વિતરણ કરવાની કામગીરી જૂન માસથી ચાલુમાં છે.
પાટણ જિલ્લામાં જંગલની જમીન તેમજ જંગલ સિવાયની જમીનમાં વૃક્ષનું પ્રમાણ વધે તે માટે ચાલુ વર્ષે ખાતાકીય વાવેતર તેમજ વન મહોત્સવ થકી અથાગ પ્રયત્ન કરવામાં આવી રહ્યા છે. વિવિધ યોજનાઓ હેઠળ જંગલ વિસ્તારમાં તેમજ જંગલ સિવાયના બહારના વિસ્તાર જેવા કે ગૌચર, સ્વૈછિક સંસ્થા, સ્મશાન ભૂમિ, ખેડૂતોની જમીન તેમજ રોડ વિસ્તારમાં રોપાઓનું વાવેતર થકી જિલ્લાને લીલોછમ કરવાનો લક્ષ્યાંક છે. આ પ્રસંગે HODCO ના ચેરમેનશ્રી કે.સી.પટેલ દ્વારા વનમહોત્સવલક્ષી ઉદબોધક પ્રવચન આપવામાં આવ્યું હતું.
આ પ્રસંગે સંબોધન કરતાં કેબિનેટ મંત્રીશ્રી બળવંતસિંહ રાજપૂતે જણાવ્યું હતું કે, મુખ્યમંત્રીશ્રી ભૂપેન્દ્રભાઈ પટેલના પ્રયાસોના લીધે ગુજરાત વનીકરણ દિશામાં આગળ વધી રહ્યું છે. વન મહોત્સવની શરૂઆત કનૈયાલાલ મુન્શી દ્વારા શરૂઆત કરવામાં આવી હતી. જેને ગુજરાતમાં ઘર ઘર સુધી પહોંચાડવામાં ભારતના યશસ્વી વડાપ્રધાન શ્રી નરેન્દ્રભાઇ મોદીનો સિંહ ફાળો છે. ગુજરાતના તત્કાલીન મુખ્યમંત્રી અને અત્યારના વડાપ્રધાનશ્રી નરેન્દ્રભાઈ મોદી દ્વારા સને ૨૦૦૪માં વન મહોત્સવ ને જન આંદોલન બનાવવાનો પ્રયાસ કર્યો. જેથી સમગ્ર ભારત અને ગુજરાતમાં વનવિસ્તારમાં વધારો થઈ રહ્યો છે. ભારતનો સમગ્ર વન આવરણ ૨૨% છે જેના પ્રમાણમાં ગુજરાતમાં વન આવરણ વધે તે માટે આપણે સામુહિક પ્રયત્નો કરવા જોઈએ. ભવિષ્યમાં જ્યારે ભારત મહાસત્તા બનશે ત્યારે આપણે ભાવિ પેઢીને પર્યાવરણ નહીં આપીએ તો ? એટલા માટે જ દરેકે સંકલ્પ કરવો પડશે અને વૃક્ષો વાવવા આગળ આવવું પડશે. આપણે સૌએ જીવનમાં ઓછામાં ઓછા ૧૬ વૃક્ષો નું વાવેતર કરી તેનું જતન કરીએ. અને ભાવિ પેઢીને પ્રેરણા આપીએ. કારણ કે પર્યાવરણના લીધે જ આયુષ્ય વધે છે તેમજ તાપમાનની ડિગ્રી માં ઘટાડામાં પર્યાવરણ અગત્યનો ભાગ ભજવે છે.
૭૬મા વન મહોત્સવમાં જિલ્લા પંચાયત પ્રમુખશ્રી હેતલબેન ઠાકોર, રાધનપુર ધારાસભ્યશ્રી લવિંગજી ઠાકોર, જિલ્લા કલેકટરશ્રી તુષાર ભટ્ટ, નિવાસી અધિક કલેક્ટરશ્રી વી.સી.બોડાણા, વન વિભાગના અધિકારીશ્રીઓ – કર્મચારીઓ, સંગઠનના આગેવાઓ, બહોળી સંખ્યામાં વિધાર્થીઓ તેમજ જીલ્લાના ઉચ્ચ અધિકારીઓ અને પદાધિકારીઓ ઉપસ્થિત રહ્યા હતા.
The Gujarat Live News ગોવાભાઈ આહીર પાટણ
