નવનિયુક્ત કલેકટરશ્રી તુષારકુમાર ભટ્ટે કાર્યભાર સંભાળ્યો
શ્રી અરવિંદ વિજયનને રાજ્ય સરકાર દ્વારા બેસ્ટ જિલ્લા ચુંટણી અધિકારીનો એવોર્ડ આપી સન્માનિત કરાયા હતા
પાટણ જિલ્લા કલેક્ટર તરીકે પ્રશંસનીય કામગીરી બજાવી વિદાય લઇ રહેલા શ્રી અરવિંદ વિજયને હૂંફાળું વિદાય માન આપવા તેમજ પાટણ જિલ્લા કલેકટર તરીકે નવનિયુક્ત થયેલા કલેકટરશ્રી તુષાર ભટ્ટને સત્કારવા માટેનો કાર્યક્રમ કલેકટર કચેરી ખાતે યોજાયો હતો. જેમાં જિલ્લા વિકાસ અધિકારીશ્રી સહિતના અધિકારીશ્રીઓ અને કર્મચારીશ્રીઓ ઉપસ્થિત રહ્યા હતા.
આ પ્રસંગે અધિકારીશ્રીઓએ પાટણ જિલ્લાના વિકાસમાં તેમજ જિલ્લાના પ્રાણ પ્રશ્નોને નિવારવામાં અગ્રેસર રહી કામ કરનાર કલેકટર શ્રી અરવિંદ વિજયન સાથે કરેલા કામોને વાગોળી તેઓને હુંફાળું વિદાયમાન આપી ભેટ સોગાદો અર્પણ કરી શુભેચ્છાઓ પાઠવી હતી.
શ્રી અરવિંદ વિજયને પાટણ જિલ્લા કલેકટર તરીકે ૦૩/૦૪/૨૦૨૩ ના રોજ હોદ્દો ગ્રહણ કર્યો હતો. તેમના કાર્યકાળ દરમિયાન તેમની વહીવટી દક્ષતા, સરળ સ્વભાવ અને પારદર્શક વહીવટને કારણે પાટણ જિલ્લામાં વિકાસના અનેક કામો થયા છે. તેમજ વહીવટી તંત્રની સાથે સાથે લોકોમાં પણ અનોખી લોકચાહના મેળવી હતી. રાજ્ય સરકાર દ્વારા તાજેતરમાં તેમને બેસ્ટ જિલ્લા ચુંટણી અધિકારીનો એવોર્ડ આપી સન્માન કરવામાં આવ્યું હતું. તેમની નવી નિમણૂક મેનેજિંગ ડિરેકટર તરીકે ગુજરાત ઇન્ફોર્મેટિક્સ લિમિટેડ, (GIL) ગાંધીનગર ખાતે કરવામાં આવી છે.
કલેકટરશ્રી શ્રી અરવિંદ વિજયન ની વિદાય સાથે નવનિયુક્ત જિલ્લા કલેકટરશ્રી તુષાર કુમાર ભટ્ટને આવકારવામાં આવ્યા હતા. આજરોજ તેમણે પાટણ જિલ્લા કલેકટર તરીકે વિધિવત કાર્યભાર સંભાળ્યો હતો. શ્રી તુષાર ભટ્ટ ગુજરાત ઇન્ફોર્મેટિક્સ લિમિટેડ, ગાંધીનગરમાં મેનેજિંગ ડિરેક્ટર તરીકે ફરજ બજાવતા હતા.
The Gujarat Live News ગોવાભાઈ આહીર પાટણ
